Di Duke of Sussex don resign from one charity wey e set up afta after gbege between di trustees and di chair of im board.

Prince Harry bin co-found Sentebale for 2006 in honour of im mother, Diana, Princess of Wales, to help pipo for Southern Africa wey dey live wit HIV and Aids.

E bin step down wit im co-founder, Prince Seeiso of Lesotho, and di board of trustees sake of im relationship wit chairwoman Dr Sophie Chandauka "break down beyond repair" afta dem ask her to resign and she take legal action.

Dr Chandauka bin tok say she bin report di trustees to di UK Charity Commission and don "blow di whistle" about issues including abuse of power, bullying, sexism and racism.

Di Charity Commission tok say dem dey "aware of concerns about di governance" of Sentebale and dey look into dem.

For joint statement, di duke and Prince Seeiso tok say dem dey resign from dia roles wit "heavy hearts" and dey in "solidarity wit di board of trustees".

"E dey devastating say di relationship between di charity trustees and di chair of di board break down beyond repair and create one situation," dem tok.

Dey tok say di trustees "bin act in di best interest of di charity" as dem ask Dr Chandauka to step down, but say her decision to take legal action to retain her position dey "further show di broken relationship".

Dem add say dem go dey share dia concerns wit di Charity Commission "as to how dis bin come about".

Former trustees Timothy Boucher, Mark Dyer, Audrey Kgosidintsi, Dr Kelello Lerotholi and Damian West bin describe dia decision as "nothing short of devastating" for all of dem.

Dey tok say dem don lost trust and confidence in di chairwoman but her legal action to block dem so dem no go remove her mean say dem get no oda option dan to resign.

Dem say dis na in di "best interest of di charity", as e no fit take on di "legal and financial burden" of di lawsuit.

In response, Dr Chandauka tok say her work for Sentebale dey "guided by di principles of fairness and equitable treatment for all".

"Pipo dey in dis world wey dey behave as though dem dey above di law and mistreat pipo, and den play di victim card and use di very press dem no like, to harm pipo wey get di courage to challenge dia conduct," she tok.

Dis, she tok, na di "tori of a woman wey dare to blow di whistle about issues of poor governance, weak executive management, abuse of power, bullying, harassment, misogyny, misogynoir [discrimination against black women] - and di coverup wey follow".

Her work wit di charity "no be vanity project from which I fit resign wen I dey called to account", she add.

She tok say di High Court don accept her application to hear her case.

Di trustees and princes never respond directly to her allegations.

Dr Chandauka, one corporate finance lawyer, don previously serve on Sentebale board between 2009 and 2015 bifor she become chairwoman, according to di charity website.

She don work for companies like Morgan Stanley, Meta and Virgin Money, and dey appointed MBE for her contributions to diversity in business in 2021.

Di charity sef tok say dem "never receive resignations from either Royal Patron", but no confirm "restructuring" of im board on Tuesday.

Dem tok say dem dey look to bring in more experts "wit di capabilities and networks to fast track Sentebale transformation agenda".

Di charity add say dem don announce plans last April to move from development organisation wey dey address di impact of HIV and Aids on children and young pipo in Lesotho and Botswana to "one wey dey address issues of youth health, wealth and climate resilience in Southern Africa".

"Di recalibration of di board, therefore, na part of Sentebale ambitious transformation agenda,"di charity add.

Di Charity Commission tok say dem dey "aware of concerns" over Sentebale governance, dem add say: "We dey assess di issues to determine di appropriate regulatory steps."

Sentebale don be part of Prince Harry world for im entire adult life. E bin don ride di storm of family fallout and leave royal life behind.

E bin first visit Lesotho, di landlocked mountain kingdom for southern Africa, wen e be 19, for 2004. E bin just comot Eton and dey on a gap year bifor im military training for Sandhurst.

E be formative time for Harry.

Wetin e bin see during im gap year bin prompt am to set up di charity two years later.

E go support children wey don lose parents to HIV and Aids.

And den, di Diana factor dey. Sentebale mean "forget-me-not" in Sesotho, di language of Lesotho.

Back for dat Sentebale dinner for 2020, e bin tell guests: "Wen I lost my mum… you bin take me under your wing. You bin look out for me for so long."

Di connection to Diana, Princess of Wales, na important personal part of di Sentebale story.

Im joint founder, Prince Seeiso of Lesotho, bin also lose im mother. Dey bin both dey motivated by a sense of loss. To dey remember dia mothers bin drive much of wetin dem don do over di past two decades.

Prince Seeiso become personal friend of Harry. Seeiso be guest for im wedding for Windsor for 2018. E also dey di wedding of di Prince and Princess of Wales for Westminster Abbey seven years earlier.

Dis make dia joint decision to waka away from Sentebale all di more powerful.

Prince Harry move to di US don impact im ability to dey hands-on wit some of im charity work. But im team for California say e remain strong supporter of dem all and play active part in wetin dem dey do.

E bin last visit Lesotho for 2024 and, wit Prince Seeiso, e bin see di latest work wey di charity dey do. Im commitment to di charity no go "ever stop", e tok.

But, for now, Prince Harry don waka away for wetin clearly don be one catastrophic breakdown in di trustees' relationship wit di chair of di board.

Personal fallout don dey, fight over di charity future direction, and broken relationships wit damaging accusations dey made.

Prince Harry don dey here bifor.


Prince Harry bin co-found di charity for 2006




Harry and Prince Seeiso of Lesotho become beta friends sake of dia work for di charity